Bost minutuko ikastaroa - Mintzanet

Bost minutuko ikastaroa: Martxoaren 8an; Zaintza; eta Helena Azkarragaurizar

Iturria: Jabier Oses Azurmendi
Eusko Jaurlaritzako Kultura eta Hizkuntza Politika Saila

Euskara hobetzen

Noiz martxoaren 8an eta noiz martxoak 8

Esaldi egokia eta erabilia da euskaraz martxoak 8 ditu gaur. Orobat, esan daiteke Gaur, martxoak 8, emakumeen nazioarteko eguna da. Baina martxoak 8 horrek ez du beste jokorik onartzen, ezin baita deklinatu; gainera, ez da egokia galdegaiaren eta aditzaren artean jartzea, traban.

Berria

oker

zuzen

Martxoak 8 izango da hitzaldia

Martxoaren 8an  izango da hitzaldia

Martxoak 8an izango da hitzaldia

Martxoaren 8an izango da hitzaldia

Artikulua

Nork zaintzen du? - Mintzanet

Genero batek eta bertzeak enplegua, zaintza lanak eta militantzia nola uztartzen dituen aztertu du Marina Sagastizabalek liburu bilakatu duen tesian.

Badaude ohiko etxeko lanak deitzen direnak —kozinatzea, harrikoa egitea—, egunero nahitaez egin behar direnak, eta noizbehinka egiten direnak —erosketak, konponketak—. Gizonen inplikazioa gehiago dator noizbehinkako horietatik. Eta umeen zaintzan ere, adibidez, lan ludikoagoak egiteko joera ikusten da gizonengan.

Presentzia hirukoitza azaltzeko eredu batzuk sortu dituzu elkarrizketetatik. Zein dira?

Figura bat da ama txarrarena; hau da, bere bizitzan zehar inoiz ez diona uko egin parte hartze soziopolitikoaren eremuan egoteari. Bere gertuko inguruak gaizki ikusi du askotan inplikazio hori; ulertu delako —bereziki, ama izan denean— ez zela haren eginkizuna hor egotea. Gaizki ikusi da umeekin bileretara joatea eta gero berandu iristea etxera, «eta ea nork egiten duen afaria». Emakume horiek egin behar izan dute autoafirmazio ariketa handi bat hor mantentzeko.

Zer ondorio dakartza horrek?

Emakume horien kontakizunetan, errua oso presente dago. Ama batek kontatzen du, adibidez, garai batean goizez lan egin eta arratsaldez ikasten zuenean, bere semea aitona-amonekin geratzen zela eta umea ez zela abandonatua sentitzen; aldiz, egon denean goizez lanean eta arratsaldez manifestazioetan edo asanbladetan, eta semea aitona-amonekin utzi duenean, hor bai sentitu dela umea abandonatua.

Zer dago horren atzean?

Sozialki emakume langilearen figura onartua dago ja: igual duela hamarkada batzuk ez zen zilegi, haren rola zelako etxean egotea, baina hori aldatu egin da. Aldiz, emakume militantearen figurak ez du oraindik legitimitaterik, bereziki zaintza lanak asumitzen direnean: bai seme-alabena, bai gurasoena.

Eta gizonak?

Kontrako aldean dago guztiz aurkako figura: presentzia hirukoitz antagonikoa. Topatu ditut txanpiñoi militanteak deitu ditudanak: prestutasun osoz aritzen diren militanteak, bereziki gizonak. Egiten dute ez dutelako ardurarik asumitzen zaintzaren eremuan. Egia da belaunaldi gazteetako gizonen partetik ikusten dela ez dela desiragarria, eta orain aita direnek nahiago luketela beste era batera bizi, baina diskurtsiboa da: praktikan, hein batean, oraindik hori gertatzen da.

Presentzia hirukoitz antagoniko horretan egon dira kontakizun batzuk, emakumeenak, baina beste logika batean: ardura handia hartzen dute etxeko eremuan eta zaintzarenean, eta horrek dakar haientzat ia ezinezkoa dela enpleguan eta militantzian egotea. Adinekoen zaintzaren testuinguruan oso argia da: batzuen bizitza da lanera joatea eta arratsaldeetan gurasoak zaintzea, eta asteburuetan ere bai. Ezin dute beste ezer egin.

Maddi Ane Txoperena Iribarren

Kartela

Inor kanpoan - Minztanet

Helena Azkarragaurizarren kartela.

Arrasateko Martxoaren 8ko kartel-lehiaketa irabazi du.

“Kale gorrian geratzeko arriskua” irudikatzen du kartelak 

“Kanpainaren leloa entzutearekin batera bururatu zitzaidan lehen ideiarekin sortu nuen kartela, atearen irudiarekin alegia. Kolore gorria aukeratu nuen, izan ere, kolore horrek epeltasuna adierazi dezakeen arren, arriskua ere sinbolizatzen duelako, eta hori da, hain zuzen nik irudikatu nahi nuena, kale gorrian geratzeko arrisku hori”, adierazi du irabazleak.

Goiena

 

Jabier Oses Azurmendi

Hizkuntza normalizazioko teknikaria

Kultura eta Hizkuntza Politika Saila

Agian hau ere gustatuko zaizu

Utzi erantzuna

Zure e-posta helbidea ez da argitaratuko. Beharrezko eremuak * markatuta daude