Mintzanetek eta Etxepare Euskal Institutuak euskal sortzaileak eta munduko unibertsitateko ikasleak harremanetan jarriko ditu

Mintzanetek egitasmo berria jarri du martxan. Etxepare Euskal Institutuarekin batera euskal sortzaileak eta munduko unibertsitateko ikasleak harremanetan jarriko ditu proiektu honek.

Mintzanetek berezko plataforma sortu du eta horretaz baliatuko dira munduan zehar dauden ikasleak euskal sortzaileekin solasaldiak eduki ahal izateko.

Interneti esker mundua inoiz baino globalagoa den honetan euskal sortzaileek ere sekula baino presentzia handiagoa izango dute nazioarteko unibertsitateetan:  Etxepare Euskal Institutuaren eta Maramara taldeko Mintzanet egitasmoaren arteko lankidetzari esker, euskal egileek eta eragileek zuzeneko prestakuntza-saioak eskaini ahalko dizkiete, Euskal Herritik, Institutuak mundu osoko 36 unibertsitateetan dituen euskara eta euskal kultura ikasleei.

Lehenbiziko saioa izan da eta bertan Eider Rodriguez idazleak eta Poznaneko (Polonia) Adam Mickiewicz Unibertsitateko ikasleek parte hartu dute. Amaia Donés irakasleak lagundu die ‘Katu jendeak’ liburuaren inguruko galderak prestatzen.

Aurkezpena Donostiako Koldo Mitxelena Kulturunean egin da eta bertan Aizpea Goenaga, Etxepareko Euskal Institutuko zuzendariak, Mari Jose Olaziregi, Euskara Sustatu eta Hedatzeko zuzendariak, Ritxi Lizartza, Maramara* enpresako zuzendariak, eta Eider Rodriguez idazleak parte hartu dute.

Aizpea Goenaga, Marijose Olaziregi, Eider Rodriguez eta Ritxi Lizartza
Aizpea Goenaga, Marijose Olaziregi, Eider Rodriguez eta Ritxi Lizartza

Eider Rodriguez idazleak eta poloniako ikasleek egin zuten saioa

Mintzanet familia

‘Familia’ hitzaren laugarren adiera bat dator Mintzanetekin. “Nolabaiteko loturak elkartzen dituen lagun edo gauzen multzoa”. Seguru aski, gaur egun hori da Mintzanet, euskarak lotzen duen lagun multzo bat. Baina niri Eusko Jaurlaritzaren Hiztegi Entziklopediaren lehenbiziko adiera gehiago gustatzen zait: “Ahaidetasun hurbilak lotzen dituen kideen multzoa, berez etxe berean bizi direnak”. Gaur egun proiektu hau zer den hobe deskribatzen baitu.
Duela sei hilabete maramara* taldeak egitasmo hau jarri zuen martxan Donostiako Udalaren, Eusko Jaurlaritzaren Etxepare Institutuaren, EHUren, Topagunearen eta Bagera Elkartearen sostenguarekin. Euskara bultzatzea da bere helburu nagusia eta horretarako Internet erabiltzen da. Horren sinple. Elkarrizketak sarean antolatzen dira laguntzaile eta ‘ikasleen’ edo hobetu nahi dutenen artean. Orduz geroztik, gure bidelagunek eta bidelariek saio asko egin dituzte eta gero eta jende gehiagok ezagutzen du zerbitzu soziala izateko bokazioa duen proiektu hau. Izan ere, 200 pertsona inguruk osatzen dute orain Mintzanet eta familia birtual baina benetako batean bihurtu dela esan genezake.
Gehiago irakurri “Mintzanet familia”

Mintzanet ‘Berria’ eta ‘Noticias de Gipuzkoa’ egunkarietan

 

Hemen dituzue ‘Berria’ eta ‘Noticias de Gipuzkoa’ egunkarietan Mintzaneten inguruan argitaratu diren erreportaiak. Bertan, bidelagun baten (Kepa Sarasola) eta bere bidelariaren (Jose Mari Arbina) esperientzia ezagutu dezakuzue.

 

Noticias de Gipuzkoa

 

Berria

 

 

Kepa Sarasola bidelaguna. Argazkia: Ruben Plaza

Xabier Euzkitzek, Kike Amonarrizek, Egoitz Lasak eta David Doblasek Mintzanet proiektua ezagutu dute

Xabier Euzkitze (‘Bisitaria’, ETB1) eta Kike Amonarriz (‘Mihiluze’, ETB1) telebista aurkezleek, Egoitz Lasa aktoreak eta David Doblas Lagun Aro GBCko jokalariak Bagerak antolatu duen Mintzodromoan parte hartu dute. Donostiako San Telmo museoan izan da ekitaldia, eta bertan Mintzanet proiektua hurbiletik ezagutu dute laurek. Ekimen honek euskara praktikatzeko aukera ematen du Internet bidez; horrela, haiek ere elkarrizketak izan dituzte etxean zeuden pertsonekin.


Mintzanet Ibilaldian egon zen

Mintzanet ekimenak Ibilaldia 2013an parte hartu zuen. Portugaletera hurbildu ginen gure proiektua ezagutzera emateko eta gure txokora, Asti Leku ikastolako gunera, jende andana etorri zen, besteak beste, Julian Iantzi aurkezlea. Lanean zegoen baina tartetxo bat aurkitu zuen gurekin egoteko. Hemen dituzue atzoko argazki batzuk.

EHUko ikasleek aukera askeko kredituak lor ditzakete Mintzaneten parte hartzeagatik

Hemendik aurrera EHUko ikasleek aukera askeko kredituak lortu ahal izango dituzte Mintzaneten parte hartzeagatik. Proiektuaren arduradunek Unibertsitatearekin akordio bat sinatu dute, eta honen ondorioz ikasleek kredituak eskuratuko dituzte Internet bidez euskara ikasten ari direnekin praktikatzeagatik, hau da, bidelagun izateagatik.
Informazio guztia esteka hauetan aurki dezakezue.

*Azalpena EHUren webgunean (euskaraz)

*Explicación en la página web de la UPV/EHU (en castellano)

Mintzagun egitasmoa ezagutzera eman da

Apirilaren 10ean Mintzagun egitasmoa ezagutzera eman da Oarsoaldeko Euskara Batzordeak (Pasaia, Errenteria, Lezo, Oiartzun). Oarsoaldea Garapen Agentziako lehendakariak, Aiora Perez de San Romanek adierazi duenez, “gure euskaltegietan, egungo metodologia eragingarriei esker, ederki bereganatzen dituzte euskaldungaiek hizkuntzaren oinarriak, eta elkarrizketa txukunak gauzatzeko adina ikastera heltzen dira”. “Euskara bereganatzea lortzen duen horietako askok ordea, gehienek ez esatearren, ez dute inguruan euskaraz hitz egingo dien inor izaten, familian, lagunartean… Euskaltegia izaten da eurentzako mintzatzeko gune bakarra. Behar horri erantzunez sortu da Mintzagun egitasmoa”, esan du. Eskualdeko ikasleei eta euskara ikasi berri dutenei euskara erabiltzeko aukerak eskaintzeko, hain zuzen ere. Mintzagunek euskalduntzearen dimentsio soziala nabarmendu, indartu eta zabaldu nahi du.
Mintzagun ekimenak oraingoz hiru atal izango ditu: euskaltegietako tailerrak gai desberdinen inguruan (argazkigintza, postura egokien tailerra,…) dagoeneko gauzatzen ari direnak; Mintzagun jaia, euskara ikasleen jaia izango da, aurten lehen aldikoz egun pasa bat antolatu dute maiatzaren 11an egingo dena, larunbatez, Errenterian -eguerdiko 12:00etan, ongietorria, bisita gidatuak egingo dira Errenteriako parte zaharrean barrena, Flashmob-a Zumardian, Triki-poteoa egingo da tabernaz taberna, bazkaria Zumardian eta musika emanaldia; eta azkenik Mintzalaguna egitasmoa. Ekimen hau indartzeko neurriak hartuko dituzte, mintzalagunak ugaritzeko lanketa, gurasoentzako mintzalagun saioak antolatzea aztertu, formatu berriak, parkeetan, kafetegietan…Eskualdeko gainerako herri, barruti eta auzoetara zabaltzeko saiakera egingo dute. “Mintzalaguna euskara erabiltzeko aukera gisa berrindartu nahi dugu ez dagoen eremu eta arloetan”, adierazi du Oarsoaldeako lehendakariak.

Mintzanet proiektua San Telmoko Mintzodromoan egon da

Ia 150 lagun inguruk hartu zuten parte martxoaren 19an Donostiako San Telmo museoan antolatu zuen Mintzodromoan. Hara bertaratu zirenek Mintzanet proiektua ezagutzeko parada izan zuten. Besteak beste, Julian Iantzi aurkezlea eta Harkaitz Cano idazlea aritu ziren jendearekin solasean Internet bidez. Gainera, Donostiako Udaleko hainbat zinegotzi ere hurbildu ziren: Nerea Txapartegi (Bildu), Marisol Garmendia (PSE-EE), Iñigo Arcaúz (PP) eta Martin Ibabe (EAJ).